Политика за откажување и враќање на средства
Последно ажурирање: 18 октомври 2026
Оваа политика објаснува кога и колку пари ви се враќаат кога откажувате, поместувате или не доаѓате на термин резервиран преку AURA. Таа е дел од Условите за користење. Услугите ги обезбедуваат независни бизниси (салони и самостојни професионалци), а AURA ги обработува резервациите и плаќањата.
1. Што плаќате при резервација
Зависно од бизнисот, при резервација може да:
- платите депозит онлајн, а остатокот кај бизнисот. Процентот на депозитот го одредува бизнисот;
- платите цела цена онлајн; или
- резервирате без онлајн плаќање и целиот износ да го платите кај бизнисот.
Пред да платите, на екранот се прикажани: цената, износот што се плаќа онлајн и рокот за откажување на тој бизнис. Истите податоци ги добивате и во потврдата за резервацијата.
2. Рок за откажување
Рокот за откажување е стандардно 24 часа пред почетокот на терминот. Секој бизнис може да постави свој рок, од 12 до 72 часа. Важи рокот прикажан при вашата резервација.
3. Кога се враќаат парите
| Ситуација | Што се случува со платениот износ |
|---|---|
| Откажувате пред рокот за откажување | Целиот платен износ ви се враќа. |
| Резервирате кога рокот веќе започнал и откажувате во рок од 10 минути | Целиот платен износ ви се враќа. |
| Резервацијата чека потврда од бизнисот, а вие ја откажувате или бизнисот не ја прифаќа | Целиот износ ви се ослободува или враќа. |
| Откажувате во рокот за откажување | Депозитот останува кај бизнисот како надомест за изгубениот термин. Ако сте платиле цела цена, разликата над депозитот ви се враќа. |
| Не се појавувате на терминот | Исто како доцно откажување: депозитот останува кај бизнисот, а разликата над депозитот ви се враќа. |
| Бизнисот го откажува вашиот термин | Избирате: бесплатно поместување на друг термин или враќање на целиот платен износ. |
| Банката го потврдила плаќањето доцна, а терминот во меѓувреме е зафатен | Плаќањето автоматски се поништува или се враќа целиот износ, и добивате известување. |
| Услугата не е извршена или е битно различна од опишаната | Пријавете го до нашата поддршка во рок од 7 дена од терминот. Го проверуваме со бизнисот и, ако барањето е основано, враќањето се одобрува целосно или делумно. |
| Резервација без онлајн плаќање | Нема износ за враќање. Доцните откажувања и непојавувањата се евидентираат. |
Повторено непојавување или доцно откажување може да доведе до ограничувања на профилот, вклучително задолжително плаќање однапред или привремено блокирање.
4. Поместување на термин
- Пред рокот за откажување: терминот можете да го поместите бесплатно, колку пати сакате.
- Во рокот за откажување: дозволено е едно бесплатно поместување, а депозитот се пренесува на новиот термин. Секоја следна промена се смета за доцно откажување.
- Ако новиот термин има друга цена: ако сте платиле цела цена, разликата се доплаќа или ви се враќа. Ако сте платиле само депозит, тој се пренесува непроменет, а остатокот го плаќате кај бизнисот. Ако пренесениот депозит е поголем од новата цена, разликата ви се враќа.
- Last minute попустите важат само за конкретниот термин. Ако го поместите, за новиот термин важи неговата цена.
5. Ваучери и промо кодови
- Се враќа само износот што навистина сте го платиле. Попустот од промо код или ваучер не се исплаќа во пари.
- Ако резервацијата е откажана навреме или без ваша вина, ваучерот ви се враќа и може повторно да го користите до неговиот рок на важност.
- Ако откажете доцна или не се појавите, ваучерот се смета за искористен.
6. Како и кога се враќаат парите
- Парите се враќаат на истата картичка со која е платено. Не се враќаат во готовина ниту на друга картичка.
- Враќањето го покренуваме автоматски, во моментот на откажувањето. За пријавите од точка 3 за неизвршена услуга, враќањето го покренуваме по одлуката.
- Ако износот бил само блокиран на картичката, тој се ослободува. Ако бил наплатен, се враќа.
- Колку брзо парите ќе се видат на вашата сметка зависи од банката што ја издала картичката, и обично трае неколку работни дена.
- Сите износи се во македонски денари (МКД). Кај картички во друга валута, курсните разлики и надоместоците на вашата банка не се во надлежност на AURA.
7. Контакт
За прашања за откажување или враќање на средства:
Е-пошта: auramk.app@gmail.com
Телефон: 073 800 700
ПДС 2026 ДОО Скопје, Тасино Чешмиче бр.29, Скопје – Центар